नेपाल प्रिमियर लिग (एनपीएल) को तेस्रो संस्करणमा जनकपुर बोल्ट्सले पहिलो जित दर्ता गरेको छ। त्रिवि क्रिकेट मैदानमा काठमाडौं गोर्खाजले दिएको ११६ रनको लक्ष्य जनकपुरले १७ ओभर २ बलमा २ विकेट गुमाएर पूरा गरेको हो।
जनकपुरको जितमा मोइन अलीले अविजित ५८ रनको अर्धशतकीय इनिङ्स खेले। उनले ५१ बलमा ३ चौका र ३ छक्का प्रहार गरे। सैफ हसनले ३९ बलमा अविजित ४० रन बनाए। मोइन र सैफले तेस्रो विकेटका लागि ७९ रनको अविजित साझेदारी गर्दै टोलीलाई जित दिलाए।
लक्ष्य पछ्याउने क्रममा जनकपुरले ७ रन हुँदा तृतराज दासलाई र ३७ रन हुँदा मयन यादवलाई गुमाएको थियो। तृतराजले ५ र मयनले ९ रन बनाए। त्यसपछि मोइन र सैफले जिम्मेवारीपूर्ण ब्याटिङ गर्दै टोलीलाई सहज जित दिलाए। काठमाडौंका रिपोन मोन्डलले एक विकेट लिए।
यसअघि टस जितेर पहिले ब्याटिङ गरेको काठमाडौं गोर्खाज १९ ओभर ३ बलमा ११५ रनमै समेटिएको थियो। काठमाडौंलाई सस्तोमा रोक्न जनकपुरका राहुल यादवले उत्कृष्ट बलिङ गरे। उनले ४ ओभरमा ३१ रन खर्चेर ४ विकेट लिए। राहुलले दुवै ओपनर साम हिजलेट र स्मित पटेलसँगै कप्तान करण केसी तथा मोहम्मद आदिल आलमको विकेट लिए।
जनकपुरका सैफ हसनले २ विकेट लिए भने मोइन अली, कप्तान हरमीत सिंह र ललित राजवंशीले एक–एक विकेट हात पारे।
काठमाडौंका लागि भीम सार्कीले सर्वाधिक ३३ रन बनाए। उनले २९ बलमा ४ चौका प्रहार गरे। रसिद खानले १७, स्मित पटेलले १३ र सुमित महर्जनले १० रन बनाए। काठमाडौंले खेलभर ठूलो साझेदारी बनाउन नसक्दा लगातार विकेट गुमायो।
पहिलो खेलमा जनकपुर कर्णाली याक्ससँग १९ रनले पराजित भएको थियो। दोस्रो खेलमा आज साँझ ५ बजे विराटनगर किंग्स र कर्णाली याक्सबीच प्रतिस्पर्धा हुनेछ।
