काठमाडौं महानगरपालिकाले जाडो मौसम सुरु भएसँगै वायु प्रदूषणबाट हुनसक्ने स्वास्थ्य जोखिम बढ्ने भन्दै प्लास्टिकजन्य फोहरमैला खुला रूपमा नबाल्न नागरिकलाई आग्रह गरेको छ ।
महानगरपालिकाको वातावरण विभागले सवारीसाधनबाट निस्कने धुवाँ, सडक तथा निर्माण कार्यबाट उत्पन्न धुलो, उद्योग तथा कलकारखानाबाट निस्कने धुवाँधुलो र खुला रूपमा प्लास्टिकजन्य फोहरमैला बाल्दा निस्कने धुवाँलाई वायु प्रदूषणका प्रमुख कारणका रूपमा औंल्याएको छ ।
वातावरण विभागका प्रमुख सरिता राईले प्रदूषण नियन्त्रणका लागि मापदण्डविपरीतका गतिविधि नगर्न र नगराउन सम्बन्धित सबै पक्षलाई आग्रह गरेकी छन् । उनका अनुसार खराब वायु प्रदूषणले विशेषगरी बालबालिका, ज्येष्ठ नागरिक, दम तथा खोकीका बिरामी र दीर्घरोग भएका व्यक्तिलाई बढी जोखिममा पार्ने गरेको छ ।
महानगरले सवारीसाधनलाई प्रचलित प्रदूषण नियन्त्रण मापदण्डअनुसार सञ्चालन गर्न तथा नियमित मर्मतसम्भार गरी धुवाँ उत्सर्जन कम गर्न सुझाव दिएको छ । त्यसैगरी निर्माणजन्य सामग्री सडक तथा फुटपाथमा थुपार्न नहुनेमा जोड दिएको छ ।
उद्योग, कलकारखाना तथा अस्पतालले महानगरको प्रदूषण नियन्त्रण मापदण्ड, २०८१ ले तोकेको वायु गुणस्तर तथा धुवाँसम्बन्धी मापदण्ड पालना गर्नुपर्ने महानगरले जनाएको छ । उद्योगहरूमा वायु प्रदूषण कम गर्ने उपकरणको प्रयोग गर्न पनि आग्रह गरिएको छ ।
जाडो मौसममा वायुमण्डलमा प्रदूषित कणहरू जम्मा हुने जोखिम बढ्ने भएकाले खुला रूपमा फोहर जलाउने कार्य रोक्नु, सवारीसाधनको धुवाँ नियन्त्रण गर्नु र निर्माण तथा औद्योगिक गतिविधिमा वातावरणीय मापदण्ड पालना गर्नु आवश्यक रहेको महानगरको भनाइ छ ।
