भ्रमणमा रहेका भारतीय विदेश सचिव विक्रम मिश्रीले बिहीवार बिहान सिंहदरबारस्थित प्रधानमन्त्री तथा मन्त्रिपरिषद्को कार्यालयमा प्रधानमन्त्री बालेन शाहसँग शिष्टाचार भेटवार्ता गरेका छन् ।
भेटका क्रममा नेपाल र भारतबीचको ऐतिहासिक द्विपक्षीय सम्बन्धलाई थप सुदृढ र विस्तार गर्ने विषयमा छलफल भएको छ । दुई देशबीच आपसी हित, कनेक्टिभिटी, व्यापार तथा सांस्कृतिक सम्बन्धका विविध आयामबारे सकारात्मक कुराकानी भएको प्रधानमन्त्रीको सचिवालयले जनाएको छ ।
दुई दिने औपचारिक भ्रमणका लागि बुधवार काठमाडौं आएका मिश्रीले उच्चस्तरीय भेटघाटलाई निरन्तरता दिएका हुन् । प्रधानमन्त्री शाहसँगको भेटमा उनले भारत सरकारका तर्फबाट नेपालको विकास र समृद्धिमा निरन्तर सहकार्य गर्ने प्रतिबद्धता व्यक्त गरेका छन् ।
भारतीय विदेश सचिवको भ्रमणलाई कूटनीतिक वृत्तमा महत्वपूर्ण मानिएको छ । दुई देशबीचका बाँकी विषयमा समझदारी निर्माण गर्न तथा उच्चस्तरीय संवादलाई निरन्तरता दिन यस्ता भ्रमणले सहयोग पुग्ने विज्ञहरूको बुझाइ छ ।
