ऊर्जा, जलस्रोत तथा सिँचाइ मन्त्री विराजभक्त श्रेष्ठले जलवायु परिवर्तनका कारण बढ्दै गएका प्राकृतिक विपद्को जोखिम न्यूनीकरण, सुरक्षित पूर्वाधार निर्माण र पर्वतीय अर्थतन्त्रको विकासका लागि नेपाल र एसियन इन्स्टिच्युट अफ टेक्नोलोजी (एआईटी) बीच व्यावहारिक सहकार्य आवश्यक रहेको बताएका छन्।
थाइल्यान्डस्थित नेपाली राजदूतावास र एआईटीको संयुक्त आयोजनामा बैंककमा आयोजित गोष्ठीलाई सम्बोधन गर्दै मन्त्री श्रेष्ठले यस्तो बताएका हुन्।
‘अनुसन्धान, नवप्रवर्तन र साझेदारीमार्फत एसियामा विपद् उत्थानशीलताको प्रवर्द्धन : नेपालमा उत्थानशील पुनर्स्थापना र पुनर्निर्माण’ विषयक गोष्ठीमा जलवायु परिवर्तनका प्रभावसँग जुध्न अनुसन्धान, प्रविधि र संस्थागत साझेदारीको महत्त्वमा जोड दिइएको थियो।
मन्त्री श्रेष्ठले प्राकृतिक विपद्का जोखिम न्यूनीकरणसँगै सुरक्षित र दिगो पूर्वाधार निर्माण तथा पर्वतीय क्षेत्रको आर्थिक सम्भावनालाई उपयोग गर्न नेपाल र एआईटीबीचको सहकार्य प्रभावकारी हुनुपर्ने धारणा राखेका छन्।
जलवायु परिवर्तनका कारण हिमाली तथा पर्वतीय क्षेत्रमा विपद्को जोखिम बढिरहेका बेला अनुसन्धान र नवप्रवर्तनमा आधारित सहकार्यले विपद्पछिको पुनर्स्थापना तथा पुनर्निर्माणलाई थप उत्थानशील बनाउन सहयोग पुग्ने अपेक्षा गरिएको छ।
