दशैं मनाउन उपत्यकाबाहिर गएकाहरू काठमाडौं फर्किने क्रम जारी छ। दशैं बिदा सकिएर भोलिदेखि सरकारी कार्यालय नियमित सञ्चालनमा आउने भएपछि काठमाडौं भित्रिने यात्रु तथा सवारीसाधनको चाप बढेको छ।
काठमाडौं प्रवेश गर्ने प्रमुख नाका नागढुंगासहित कलंकी, बालाजु, कोटेश्वर र बल्खु क्षेत्रमा यात्रु तथा सवारीसाधनको चहलपहल बढेको छ। नयाँ बसपार्क क्षेत्रमा पनि यात्रु र सवारीसाधनको भिडभाड देखिएको छ।
दशैंका बेला अधिकांश मानिस गाउँ फर्किएपछि सुनसान बनेको काठमाडौं उपत्यकामा अहिले पुनः चहलपहल बढ्न थालेको छ। सडकमा सवारीसाधनको आवागमन बढ्नुका साथै सार्वजनिक यातायात र बजार क्षेत्रमा पनि गतिविधि सामान्य अवस्थामा फर्किन थालेका छन्। अधिकांश बजार तथा पसलसमेत खुलिसकेका छन्।
