“ग्यास अभावः उपभोक्ताको लाम, खाली सिलिन्डर बोकेर कार्यालयमा पर्खाइ”

काठमाडौं - पछिल्ला दुई सातादेखि बजारमा ग्यासको अभाव चरम अवस्थामा पुगेको छ। विशेषगरी नेपाल ग्यासको आपूर्ति कम भएपछि उपभोक्ताहरु असहज अवस्थामा छन्। भारतबाट समयमै ढुवानी नपुगेको कारणले गर्दा नेपालमा ग्यास अभाव देखिएको हो।

नेपाल ग्यासका बिक्री केन्द्रमा ग्यास नपाउँदा उपभोक्ताहरू खाली सिलिन्डर बोकेर बालाजु औद्योगिक क्षेत्रस्थित कम्पनीको कार्यालयसम्म पुगिरहेका छन्। कार्यालय पुग्दा पनि ग्यास नपाएको अनुभव उपभोक्ताको गुनासो बनेको छ।

नेपाल ग्यास कार्यालयले बिहानदेखि दिउँसो २ बजे मात्र ग्यास वितरण गर्ने गरेको छ। यसबीच दैनिक सयौं उपभोक्ताले लाइन बस्नुपरेको र नेपाल आयल निगमले यसतर्फ ध्यानाकर्षण गरेको जनाएको छ। निगमका अनुसार, बजारमा ग्यासको हल्ला चलेको कारण स्टक राख्ने व्यवहारले आपूर्तिमा समस्या आएको हो।

जाडो मौसमको मागलाई मध्यनजर गर्दै, निगमले पछिल्ला तीन महिनामा निरन्तर ग्यास आपूर्ति गरिरहेको तथ्यांक सार्वजनिक गरेको छ। नोभेम्बर २०२५ मा ४७,२६४ मेट्रिक टन, डिसेम्बरमा ४८,५३१ मेट्रिक टन र जनवरी २०२६ मा ४७,३०४ मेट्रिक टन ग्यास वितरण भइसकेको निगमले जनाएको छ।

हाल केही सीमित उद्योगका सिलिन्डरमा मात्र अभाव देखिएको र ती उद्योगलाई तत्काल आपूर्ति सहज बनाउन निर्देशन दिइएको छ। निगमले आसन्न निर्वाचनलाई दृष्टिगत गर्दै नियमित कोटामा थप २,००० मेट्रिक टन ग्यास आयात गर्न बोटलर्सलाई एलोकेशन पठाएको छ।

निगमले उपभोक्तालाई ग्यासको आवश्यकता अनुसार मात्र खरिद गर्न र भण्डारण नगर्न पनि आग्रह गरेको छ। नेपाल ग्यास कम्पनीले ढुवानीमा समस्या देखिएको कारण ग्यास अभाव कायम रहेको बताएको छ।