उपराष्ट्रपति यादवसँग सभामुख अर्यालको भेट, संसद र राजनीतिक स्थायित्वबारे छलफल

काठमाडौँ । सभामुख डोलप्रसाद (डीपी) अर्यालले सोमबार बिहान उपराष्ट्रपति रामसहायप्रसाद यादवसँग शिष्टाचार भेटवार्ता गरेका छन्।

सभामुख अर्याल लैनचौरस्थित उपराष्ट्रपति निवास पुगेर यादवसँग भेट गरेका हुन्। सभामुखको सचिवालयका अनुसार भेटका क्रममा मुलुकको समसामयिक राजनीतिक अवस्था, संघीय लोकतान्त्रिक गणतन्त्रको सुदृढीकरण तथा संसदलाई प्रभावकारी ढंगले सञ्चालन गर्ने विषयमा छलफल भएको थियो।

त्यसैगरी, भेटवार्तामा राष्ट्रिय महत्वका समसामयिक मुद्दा, लोकतान्त्रिक संस्थाहरूलाई थप मजबुत बनाउने उपाय तथा राजनीतिक स्थायित्व कायम गर्ने विषयमा समेत विचार आदानप्रदान भएको सचिवालयले जनाएको छ।

छलफलमा संसदलाई अझ जनमुखी, उत्तरदायी र प्रभावकारी बनाउने विषयमा पनि दुवै पक्षबीच सहमति र चासो व्यक्त गरिएको बताइएको छ।