दुर्गा प्रसाईं साधारण तारेखमा रिहा, पर्सा अदालतको आदेश

वीरगञ्ज । ‘राष्ट्र, राष्ट्रियता, धर्म, संस्कृति र नागरिक बचाउ महाभियान’ का संयोजक दुर्गा प्रसाईंलाई पर्सा जिल्ला अदालतले साधारण तारेखमा रिहा गर्न आदेश दिएको छ ।

न्यायाधीश गायत्रीप्रसाद रेग्मीको इजलासले मंगलबार प्रसाईंलाई थुनामा नराखी साधारण तारेखमा राखेर अनुसन्धान तथा कानुनी प्रक्रिया अघि बढाउन आदेश दिएको अदालत स्रोतले जनाएको छ ।

जेठ ४ गते वीरगञ्जस्थित दियालो होटलबाट पक्राउ परेका प्रसाईंविरुद्ध विद्युतीय कारोबार ऐन २०६३ अन्तर्गतको कसुर र राज्यविरुद्धको कसुरमा मुद्दा दायर गरिएको थियो ।

अनुसन्धानका क्रममा प्रसाईंले युट्युबमार्फत महिला, सेना तथा प्रहरीबारे आपत्तिजनक टिप्पणी गरेको तथा विभिन्न राजनीतिक व्यक्तिहरूलाई लिएर अभिव्यक्ति दिएको आरोप लगाइएको छ ।

यसैबीच, उनले युट्युब अन्तर्वार्तामा प्रधानमन्त्री बालेन्द्र शाह, रास्वपा सभापति रवि लामिछाने, पूर्वमन्त्री कुलमान घिसिङ र सांसद हर्क साम्पाङ लगायतका व्यक्तिहरूबारे टिप्पणी गरेको उल्लेख छ ।

अदालतको आदेशपछि प्रसाईंलाई साधारण तारेखमा रिहा गरिएको छ ।