राष्ट्रपतिलाई सम्बोधन गराउनुलाई विवाद बनाउन आवश्यक छैन : सिता गुरुङ

काठमाडौं । नेपाली कांग्रेसकी नेतृ तथा पूर्वमन्त्री सिता गुरुङले गणतन्त्र दिवसका अवसरमा राष्ट्रपति रामचन्द्र पौडेललाई सम्बोधन गर्न सरकारले गरेको आग्रहलाई स्वाभाविक रूपमा लिनुपर्ने बताएकी छन् ।

रातोपाटीसँग कुराकानी गर्दै गुरुङले गणतन्त्र दिवसको विशेष समारोहमा राष्ट्रपतिले सम्बोधन गर्नु सकारात्मक अभ्यास भएको उल्लेख गरिन् । उनका अनुसार यसले गणतन्त्रको संस्थागत विकासलाई थप मजबुत बनाउन सहयोग पुग्ने विश्वास व्यक्त गरिन् ।

‘मन्त्रिपरिषद्ले औपचारिक निर्णय गरेर राष्ट्रपतिलाई जनतालाई सम्बोधन गर्न आग्रह गर्नु कुनै अस्वाभाविक विषय होइन,’ गुरुङले भनिन्, ‘राष्ट्रपतिबाट गणतन्त्र दिवस समारोहलाई सम्बोधन हुँदा व्यवस्थाप्रति जनविश्वास अझ बलियो हुन्छ ।’

सरकारको औपचारिक आग्रहपछि राष्ट्रपति रामचन्द्र पौडेलले टुँडीखेलमा आयोजित गणतन्त्र दिवस २०८३ को विशेष समारोहलाई सम्बोधन गर्ने कार्यक्रम तय गरिएको छ ।

यसअघि भने गणतन्त्र दिवसका अवसरमा प्रधानमन्त्रीले सम्बोधन गर्ने परम्परा रहँदै आएको थियो ।