नेपालमा डेढ लाख मेट्रिक टन हाराहारी रासायनिक मल मौज्दात, थप आयातमा मध्यपूर्व तनावको असर

काठमाडौं, १३ जेठ । नेपालमा हाल एक लाख ४४ हजार ५८५ मेट्रिक टन रासायनिक मल मौज्दात रहेको सरकारले जनाएको छ ।

प्रतिनिधिसभा बैठकमा जानकारी दिँदै कृषि, वन तथा वातावरण मन्त्री गीता चौधरीले चालु आर्थिक वर्षमा अहिलेसम्म ५ लाख ५४ हजार ७६२ मेट्रिक टन मल नेपाल भित्रिसकेको बताइन् । तीमध्ये ४ लाख ६३ हजार १०७ मेट्रिक टन मल किसानलाई बिक्री वितरण गरिसकिएको उनले जानकारी दिइन् ।

मन्त्री चौधरीका अनुसार गोदाममा मौज्दात रहेको, नेपाल आइसकेको तथा गोदाममा अभिलेखीकरण हुन बाँकी रहेको मल जोड्दा कुल मौज्दात एक लाख ४४ हजार ५८५ मेट्रिक टन पुगेको हो ।

सरकारले चालु आर्थिक वर्षमा करिब ६ लाख मेट्रिक टन रासायनिक मल अनुदानमार्फत उपलब्ध गराउने लक्ष्य राखेको पनि उनले बताइन् ।

यद्यपि, मध्यपूर्वमा जारी द्वन्द्वका कारण अन्तर्राष्ट्रिय आपूर्ति प्रणाली प्रभावित हुँदा नेपालमा मल आयातमा समेत समस्या देखिएको मन्त्री चौधरीको भनाइ छ । उनका अनुसार हालसम्म एक लाख ८७ हजार मेट्रिक टन मल आयात हुन सकेको छैन ।

यसैबीच, भारतसँग सरकार-सरकार (जीटुजी) प्रक्रियामार्फत ५० हजार मेट्रिक टन मल खरिद गर्ने प्रस्ताव मन्त्रिपरिषद्बाट स्वीकृत भई अगाडि बढाइएको पनि मन्त्री चौधरीले जानकारी दिइन् ।