कोलम्बियामा सैन्य विमान दुर्घटना : आगलागीपछि विस्फोट, कम्तिमा ६६ जनाको ज्यान गयो

काठमाडौं - दक्षिण अमेरिकी देश कोलम्बियामा वायुसेनाको एक सैन्य विमान दुर्घटनाग्रस्त हुँदा कम्तिमा ६६ जनाको मृत्यु भएको छ भने धेरैजना घाइते भएका छन्।

अधिकारीहरूका अनुसार देशको दक्षिणी क्षेत्रमा उडान भरेको केही समयमै विमान दुर्घटनामा परेको हो। अन्तर्राष्ट्रिय सञ्चारमाध्यम BBCका अनुसार विमानमा सवारमध्ये ठूलो संख्यामा हताहत भएको पुष्टि भएको छ।

वायुसेनाका कमान्डर कार्लोस फर्नान्डो सिल्वा रुएडाले विमानमा ११४ सैनिक र ११ जना चालक दलका सदस्य रहेको जानकारी दिएका छन्।

दुर्घटनामा परेको विमान अमेरिकामा निर्मित C-130 Hercules हो, जुन प्रायः सैनिक ओसारपसारका लागि प्रयोग हुँदै आएको थियो। उक्त विमान पुटुमायो प्रान्तअन्तर्गत पर्ने प्युर्तो लेगुइजामो नजिकै दुर्घटनाग्रस्त भएको हो।

उद्धार टोलीहरू घटनास्थलमा पुगेर भग्नावशेषमा जीवित व्यक्तिको खोजी कार्यमा खटिएका छन्।

कोलम्बियाका रक्षामन्त्री पेद्रो साञ्चेजले उक्त दुर्घटनालाई देशका लागि अत्यन्तै दुःखद घटना भन्दै पेरू सीमाना नजिकै भएको यो दुर्घटनामा ठूलो क्षति भएको बताएका छन्। प्रारम्भिक विवरण अनुसार विमानमा आगलागी भएपछि त्यसमा रहेका गोला–बारूद विस्फोट हुँदा क्षति अझ भयावह बनेको बताइएको छ।