‘देश बनाउने शक्ति एमाले’ - काठमाडौं-५ मा ईश्वर पोखरेलको तीव्र घरदैलो, नमुना क्षेत्र बनाउने प्रतिबद्धता

काठमाडौं - काठमाडौं क्षेत्र नम्बर ५ मा आगामी निर्वाचन लक्षित गर्दै ईश्वर पोखरेल ले चुनावी अभियानलाई तीव्र बनाएका छन्।

नेपाल कम्युनिस्ट पार्टी (एमाले) का उम्मेदवार पोखरेलले घरदैलो कार्यक्रममार्फत टोल–टोलमा पुगेर मतदातासँग प्रत्यक्ष संवाद गरिरहेका छन्। उनी स्थानीयबासीका गुनासा सुन्नुका साथै आफ्ना विकास योजना प्रस्तुत गर्दै समर्थन मागिरहेका छन्।

बुधबार टोखामा आयोजित कार्यक्रममा बोल्दै उनले एमाले सधैं देश निर्माणको पक्षमा उभिएको पार्टी भएको दाबी गरे। “एमाले देश बनाउने काम गर्छ, देश बिगार्ने काम गर्दैन,” उनले भने। साथै, पार्टीलाई विजयी गराउन कार्यकर्ता र समर्थकलाई जनताको घरदैलोमा पुगेर एजेन्डा स्पष्ट राख्न आग्रह गरे।

पोखरेलले जनताका आलोचना र समस्यालाई गम्भीर रूपमा लिएर समाधानतर्फ अग्रसर हुने प्रतिबद्धता व्यक्त गरे। फरक राजनीतिक परिस्थितिमा हुन लागेको यस निर्वाचनले देशलाई सही दिशामा अघि बढाउने अवसर प्रदान गर्ने उनको भनाइ थियो।

२१ फागुनमा हुने मतदानलाई लक्षित गर्दै उनले काठमाडौं-५ लाई नमुना निर्वाचन क्षेत्र बनाउने योजना सार्वजनिक गरिरहेका छन्। विकास, सुशासन र स्थायित्वका एजेन्डासहित पोखरेल अहिले मतदातामाझ सक्रिय देखिएका छन्।