सिन्धुलीमा बस-माइक्रो ठोक्किँदा ९ जना घाइते, केहीको अवस्था गम्भीर

सिन्धुली - सिन्धुलीको सुनकोशी गाउँपालिका-५, साईटार स्थित बीपी राजमार्गमा शुक्रबार बिहान माइक्रो बस र सामान्य बस ठोक्किँदा ९ जना यात्रु घाइते भएका छन्।

घटनास्थलमा काठमाडौंबाट काँकडभित्तातर्फ जाँदै गरेको बा ४ ख ५०५२ नम्बरको माइक्रो बस र विपरीत दिशाबाट खुर्कोटतर्फ जाँदै गरेको बागमती प्रदेश ०१-००६ ख २२९७ नम्बरको बस आपसमा ठोक्किएका थिए।

घाइतेमध्ये माइक्रो बस चालक गजबहादुर मगरको टाउकोमा चोट लागेको छ र उनलाई उपचारका लागि धुलिखेल अस्पताल रिफर गरिएको छ। ३२ वर्षीया प्रबिन तिवारी र ३० वर्षीया अनिता न्यौपानेलाई पनि टाउको चोट लागेपछि धुलिखेल पठाइएको छ।

अन्य घाइते प्रशान्त केसीको अनुहार र खुट्टामा गम्भीर चोट छ भने बाँकी घाइतेहरूको उपचार आत्मीय सामुदायिक अस्पताल, खाल्टेमा भइरहेको छ। चिकित्सकहरूले अधिकांशको अवस्था सामान्यदेखि मध्यम रहेको बताएका छन्।

प्रहरीका अनुसार झापाका संस्कृति यादव, कल्पना राई, अमेश खड्का, अमृत राना मगर, र दिनप्रसाद सिग्देल समेत घाइते समूहमा रहेका छन्।