मध्यपूर्वमा इरानको अमेरिकी लक्ष्यीकरण, खाडीमा क्षेत्रीय युद्धको खतरा बढ्यो

काठमाडौं – इरानले मध्यपूर्वका विभिन्न क्षेत्रमा अमेरिकी सैन्य प्रतिष्ठान र तिनका क्षेत्रीय साझेदारहरूलाई लक्षित गर्दै नयाँ व्यापक आक्रमण सुरु गरेको छ। अन्तर्राष्ट्रिय सञ्चारमाध्यम सीएनएनका अनुसार, इरानले मिसाइल र ड्रोनमार्फत इराक, सिरिया र खाडी क्षेत्र आसपासको अमेरिकी रणनीतिक स्थलहरूमा ‘वेभ अफ स्ट्राइक्स’ सञ्चालन गरेको पुष्टि भएको छ।

सुरक्षा स्रोतहरूले केही स्थानमा विस्फोटका आवाज सुनिएको र हवाई प्रतिरक्षा प्रणाली सक्रिय गरिएको जानकारी दिएका छन्। अमेरिकी रक्षा अधिकारीहरूले पनि आक्रमणहरू समन्वित र विभिन्न दिशाबाट भएको बताएका छन्, जसले क्षेत्रीय तनावलाई उच्च स्तरमा पुर्‍याएको छ।

इरानी रेड गार्डले अमेरिकामाथि “इतिहासकै भयानक र कसैले नसोचेको आक्रमण” गर्ने चेतावनी पनि दिएको छ। पछिल्लो आक्रमणलाई अमेरिकी–इजरायली सैन्य कारबाहीको प्रतिकारका रूपमा गरिएको निरन्तर रणनीतिक कदमको भाग मानिएको छ।

खाडी क्षेत्रका कतार, बहराइन, कुवेत र संयुक्त अरब इमिरेट्सले आफ्नो सैन्य सतर्कता बढाएका छन्। केही देशहरूले आंशिक हवाई क्षेत्र सीमित गरेका छन् भने अन्तर्राष्ट्रिय उडान र ऊर्जा आपूर्तिको सुरक्षाबारे चिन्ता बढेको छ।

विश्लेषकहरूका अनुसार, इरानको लगातार आक्रमणले द्वन्द्व दुई देशबीच सीमित नरही सम्पूर्ण खाडी क्षेत्रलाई ‘क्षेत्रीय सैन्य टकराव’तर्फ धकेल्ने जोखिम बढाएको छ। दुबईमा हालै विमानस्थलमा आगो लागेको र बहराइनमा क्षति भएको समाचार पनि आएका छन्।