मधेशका आवाज काठमाडौंमा पुर्‍याउन चाहन्छु : गगन थापा

१२ माघ, काठमाडौं - नेपाली कांग्रेसका सभापति गगन थापाले सर्लाही-४ बाट उम्मेदवारी दिँदा मधेशसँगको सम्बन्ध अझ प्रगाढ बनाउने लक्ष्य रहेको बताएका छन्।

उम्मेदवारी दर्ता भएको ६ दिनपछि सोमबार जारी गरेको भिडियो सन्देशमा सभापति थापाले मधेशको प्रतिनिधित्व केवल औपचारिक रूपमा नभई गहिरो रूपमा हुनुपर्नेमा जोड दिए। उनले भने, “मधेशका मुद्दा बुझ्दै प्रतिनिधित्व गर्दा, प्रकारान्तरले नेपालको व्यापक समस्याहरू समाधान गर्न सकिन्छ भन्ने विश्वास गर्छु।”

पहाडबाट काठमाडौं आएर हुर्केका थापाले मधेशसँग अझ नजिकिन र मधेशका कुरा काठमाडौंमा, काठमाडौंका कुरा मधेशमा पुर्‍याउन चाहेको बताएका छन्।

थापाले काठमाडौं–४ का मतदाताप्रति कृतज्ञता व्यक्त गर्दै भने, “तीनपटक निर्वाचित हुँदा यहाँको माया र परिवारजस्तो अनुभव जीवनका महत्वपूर्ण चरणहरूमा सँगै बित्यो।”

उनले चुनावी क्षेत्र परिवर्तन नगर्ने सुझावहरू आएको उल्लेख गर्दै, उत्तेजनाको राजनीतिमा विश्वास नगर्ने र अधिकारको सन्दर्भमा सबैबीच एकता आवश्यक हुनेमा जोड दिएका छन्।