मोबाइल स्वीचअफ गरेर भाग्दै गरेका मेगा बैंकका सीईओ पाण्डे सिन्धुलीबाट पक्राउ

नेपाल प्रहरीको केन्द्रीय अनुसन्धान ब्युरो (सीआईबी) ले ठगी तथा आपराधिक विश्वासघातको आरोपमा नेपाल इन्भेष्टमेण्ट मेगा बैंकका प्रमुख कार्यकारी अधिकृत ज्योतिप्रकाश पाण्डेलाई पक्राउ गरेको छ ।

सीआईबीका अनुसार ६३ वर्षीय पाण्डेलाई जिल्ला प्रहरी कार्यालय सिन्धुलीको सहयोगमा कमलामाई नगरपालिका–६ स्थित बसपार्क क्षेत्रबाट मंगलबार राति पक्राउ गरिएको हो । प्रहरीका अनुसार मोबाइल फोन स्वीचअफ गरी फरार हुने प्रयास गरिरहेका बेला सवारी चेकजाँचका क्रममा उनी नियन्त्रणमा परेका थिए ।

सीआईबी प्रवक्ता एसएसपी शिवकुमार श्रेष्ठका अनुसार स्मार्ट टेलिकम प्रालिको सम्पत्ति व्यवस्थापनसँग सम्बन्धित विषयमा पाण्डेमाथि अनुसन्धान भइरहेको छ । नेपाल दूरसञ्चार प्राधिकरणले अनुमति नवीकरण नभएको भन्दै स्मार्ट टेलिकमको इजाजतपत्र खारेज गरेपछि कम्पनीको सम्पत्ति र प्रणाली सरकारी नियन्त्रणमा आएको थियो ।

अनुसन्धानमा संलग्न अधिकारीहरूका अनुसार सरकारी स्वामित्वमा रहेको सम्पत्तिको व्यवस्थापन प्रक्रियामा अनियमितता गरी सरकारी हकलाई कमजोर बनाउने उद्देश्यले काम गरिएको आरोप पाण्डेमाथि लागेको छ ।

पाण्डे बैंकको लोन रिकभरी कमिटीका अध्यक्षसमेत रहेका थिए । बैंकले २०८२ असोज ३ गते सार्वजनिक गरेको लिलामी सूचनामा स्मार्ट टेलिकमको घरभाडा र विद्युत् महसुलबापत करिब ४० करोड रुपैयाँसमेत बोलपत्रदाताबाट असुल गर्नुपर्ने व्यवस्था गरिएको थियो ।

तर, उक्त रकम उठाइसकेपछि पनि सम्बन्धित घरधनीलाई भाडा तथा विद्युत् प्राधिकरणलाई महसुल नतिरेको आरोप छ । रकम संकलन गरेर पनि सम्बन्धित निकायलाई भुक्तानी नगर्दा सरकारी तथा सार्वजनिक सम्पत्तिमा क्षति पुगेको भन्दै सीआईबीले ठगी र आपराधिक विश्वासघातको अभियोगमा अनुसन्धान अघि बढाएको जनाएको छ ।