कांग्रेस प्रवक्ताको चेतावनी: असहमति मर्यादित राख्नुपर्छ, नत्र पार्टीलाई न्याय हुँदैन

काठमाडौं - नेपाली कांग्रेसका प्रवक्ता देवराज चालिसेले पार्टीभित्र फरक मत व्यक्त गर्नु स्वाभाविक भए पनि त्यसलाई मर्यादित र संवादको परिधिभित्र राख्न आवश्यक रहेको बताएका छन्।

मंगलबार सामाजिक सञ्जालमार्फत प्रवक्ता चालिसेले भने, यदि असहमति आत्मकेन्द्रित रूप लिन्छ वा समानान्तर गतिविधिमा परिणत हुन्छ भने त्यसले पार्टीलाई न्याय नगर्ने छ।

चालिसेले महाधिवेशन नजिकिँदै गरेको समयमा सबै पक्षले स्पष्ट योजना, ठोस तर्क र सकारात्मक ऊर्जा प्रदर्शन गर्दै कार्यकर्ताको समर्थन जुटाउनुपर्नेमा जोड दिएका छन्।

उनले नेतृत्वको बाटो विधानअनुसार खुला रहेको र पार्टीको अनुशासन पालना गर्न सबैले जिम्मेवारीपूर्वक अघि बढ्नुपर्ने बताए। “आजको कर्मले भोलि आफैंलाई लज्जित नपार्ने गरी अघि बढ्न आवश्यक छ,” उनले थपे।

यो टिप्पणी प्रमुखतया शेरबहादुर देउवा र डा. शेखर कोइराला समूहले आयोजना गरेको भेलालाई लक्षित गर्दै दिइएको हो, जसले पार्टीभित्रको असहमति र शक्ति सन्तुलनको विषयलाई उजागर गर्छ।