जेनजी मुभमेन्ट नेपालद्वारा प्रधानमन्त्री कार्की नेतृत्वको सरकार बहिष्कारको माग

काठमाडौँ । जेनजी मुभमेन्ट नेपालले प्रधानमन्त्री सुशीला कार्की नेतृत्वको सरकारले गैरजिम्मेवार निर्णयहरू लिइरहेको र सम्पूर्ण शासन संयन्त्र भ्रष्टाचार, पक्षपात र कुशासनले ग्रसित रहेको आरोप लगाउँदै सरकारलाई बहिष्कार गर्न आग्रह गरेको छ।

सोमबार जारी गरिएको विज्ञप्तिमा जेनजी मुभमेन्टले ऊर्जा मन्त्री कुलमान घिसिङले ४३ करोड रुपैयाँको नोक्सानी पुर्‍याएको, अर्थमन्त्री रामेश्वर खनालले डोल्मालाई गैरकानुनी कर छुट दिएको, महान्यायाधिवक्ता सविता बराल भण्डारी किशोरीहरूको डिम्ब  बिक्री प्रकरणमा संलग्न रहेको तथा प्रधानमन्त्री कार्कीकी स्वकीय सचिवले आफन्तलाई नियुक्ति दिएको आरोप लगाएको छ। यस्तै, गृहमन्त्री ओमप्रकाश अर्यालले आफ्नै काकालाई डीआइजी बनाउन सशस्त्र प्रहरीमा दरबन्दी थपेर संगठित दुराचारको बाटो समातेको दाबी समेत गरिएको छ।

मुभमेन्टले विद्रोहका आदर्श र सुशासनका लागि प्राण अर्पण गरेका सहिद तथा घाइतेहरूप्रति गम्भीर अपमान हुनेगरी सरकारले नैतिकता र जनविश्वास दुवै गुमाएको उल्लेख गरेको छ।

विज्ञप्तिमा भनिएको छ, “प्रधानमन्त्री सुशीला कार्कीले तत्काल पदबाट राजीनामा दिनुका साथै जेनजी विद्रोहको भावना र जनआकांक्षामाथि कुठराघात हुन नदिन आग्रह गर्दछौँ। सत्ता कब्जा गरेर बनेको कार्की नेतृत्वको वर्तमान मन्त्रिपरिषदलाई सार्वजनिक रूपमा बहिष्कार गर्दै अवज्ञा गर्न हामी सबै देशवासीलाई आह्वान गर्दछौँ।”