चार पटक प्रधानमन्त्री बनेपछि मात्रै पूरा भयो एक कार्यकाल : झापा–५ मा ओलीको भावुक अभिव्यक्ति

४ फागुन, काठमाडौं। केपी शर्मा ओलीले एक कार्यकाल पूरा गर्न आफूले चार पटक प्रधानमन्त्री बन्नुपरेको बताएका छन्।

सोमबार झापा–५ मा चुनावी घरदैलो कार्यक्रममा बोल्दै नेकपा एमालेका अध्यक्ष समेत रहेका ओलीले पटक–पटक सरकार विघटन हुँदा निरन्तर काम गर्न कठिन भएको अनुभव सुनाए। झापा–५ बाट प्रतिनिधिसभा सदस्यका उम्मेदवार रहेका उनले चार पटक प्रधानमन्त्री हुँदा मात्र एक कार्यकाल बराबरको समय काम गर्न पाएको स्मरण गरे।

ओलीले विकासका लागि निरन्तर अग्रसर हुनुपर्ने उल्लेख गर्दै भने, “ठ्याक्कै उभिएर प्रगति हुँदैन। अघिल्लो अवस्थाभन्दा एक कदम अगाडि बढ्नैपर्छ। अगाडि बढ्दा नयाँ ठाउँमा टेक्नुपर्छ, तर त्यो कुरा सबैले बुझ्दैनन्।”

उनले नेपालमा रेल सेवा पुनः सञ्चालन गर्ने तथा जलमार्गमार्फत समुद्रसम्म पुग्ने अवधारणा अघि सारेको प्रसंग पनि उठाए। ती योजनाहरू सुरु गरिए पनि सरकार विघटनका कारण निरन्तरता दिन नसकिएको उनको भनाइ थियो। “सरकार बन्छ, काम सुरु हुन्छ, फेरि भत्किन्छ। यसरी एक कार्यकाल बराबर काम गर्न चार पटक प्रधानमन्त्री बन्नुपर्‍यो,” उनले भने।

राष्ट्रहितका योजना अघि बढाउँदा देशभित्र र बाहिरबाट अवरोध आउने गरेको संकेत गर्दै उनले औद्योगिक क्षेत्र, पूर्वाधार तथा रंगशाला निर्माण जस्ता परियोजनामा समेत विरोध भएको बताए। विश्वका अधिकांश शहरमा सभागृह, सामुदायिक भवन र रंगशाला हुने उल्लेख गर्दै आफूले यस्ता संरचना बनाउन खोज्दा पनि आलोचना सहनुपरेको उनले बताए।

गम्भीर विषयमा धारणा राख्दा त्यसलाई ‘उखानटुक्का’ भन्दै हल्का रूपमा लिने प्रवृत्ति रहेको भन्दै उनले असन्तुष्टि व्यक्त गरे। इतिहास र शास्त्रका उदाहरण प्रस्तुत गर्दा समेत त्यसलाई मजाक बनाइएको उनको भनाइ थियो।

यद्यपि अवरोधका बाबजुद पनि विकासको यात्रालाई अघि बढाउने दृढता उनले दोहोर्‍याए।