चौम समूहको निर्णायक भेला आज: कांग्रेसभित्र शक्ति सन्तुलनको नयाँ समीकरण?

काठमाडौँमा आज नेपाली कांग्रेसको चौधौँ महाधिवेशनबाट निर्वाचित ‘चौम’ समूहको महत्वपूर्ण बैठक बस्दैछ। पार्टीका निवर्तमान कार्यवाहक सभापति पूर्णबहादुर खड्काले आफ्ना पक्षधर केन्द्रीय सदस्यहरूलाई एकत्रित गर्दै उक्त बैठकको आह्वान गरेका हुन्।

धुम्बाराहीस्थित स्मार्ट होटलमा दिउँसो १२ बजेका लागि तय गरिएको यस भेलामा पछिल्लो राजनीतिक घटनाक्रम, विशेषगरी पार्टीको आधिकारिकता सम्बन्धी सर्वोच्च अदालतको निर्णयपछि उत्पन्न परिस्थितिबारे गहन छलफल हुने बताइएको छ। साथै, आगामी १५औँ महाधिवेशनको रणनीति तय गर्ने विषय पनि बैठकको मुख्य एजेन्डा रहनेछ।

यसअघि सर्वोच्च अदालतले विशेष महाधिवेशनलाई वैधानिकता दिएपछि असन्तुष्ट देखिएको पक्ष सक्रिय बनेको छ। सोही सन्दर्भमा खड्काले शनिबार आफ्नै निवासमा निकट नेताहरूसँग प्रारम्भिक परामर्श गरेका थिए।

उक्त छलफलमा विमलेन्द्र निधि, डा. शशांक कोइराला, कृष्ण सिटौला, प्रकाशमान सिंह, डा. प्रकाशशरण महत, एनपी साउद, मीन विश्वकर्मा र रमेश लेखकलगायतका नेताहरू सहभागी थिए। सोही परामर्शको निरन्तरताका रूपमा आजको बैठक आयोजना गरिएको हो।