अपेक्षाअनुसार परिणाम आएन: ओली भन्छन्- “जनताको फैसला शिरोधार्य”

काठमाडौं। नेकपा एमालेका अध्यक्ष केपी शर्मा ओलीले प्रतिनिधिसभा निर्वाचनको नतिजा अपेक्षा अनुरूप नआएको स्वीकार गर्दै जनताको निर्णयलाई सम्मानपूर्वक स्वीकार्ने बताएका छन्।

सामाजिक सञ्जालमार्फत सन्देश जारी गर्दै उनले लोकतान्त्रिक व्यवस्थामा अन्तिम निर्णय जनताकै हुने उल्लेख गर्दै त्यसलाई शिरोधार्य गर्नु आफू र पार्टीको कर्तव्य भएको बताएका हुन्। उनले जनताको मतलाई पूर्ण सम्मानका साथ स्वीकार्ने पनि स्पष्ट पारे।

ओलीले निर्वाचनका क्रममा सूर्य चिन्हमा मतदान गरी एमालेप्रति समर्थन जनाउने सबै मतदाता, नेता, कार्यकर्ता, स्वयंसेवक, शुभेच्छुक तथा समर्थकप्रति आभार व्यक्त गरेका छन्। उनका अनुसार समर्थकहरूले देखाएको विश्वास नै पार्टीको मुख्य शक्ति हो।

निर्वाचन परिणाम पार्टीको अपेक्षाअनुसार नआए पनि जनताप्रतिको प्रतिबद्धता र सेवा भावना कमजोर नहुने उनले बताएका छन्। उनले एमाले सधैं जनताकै बीचमा रहेर जनताको हितका लागि काम गरिरहने प्रतिबद्धता व्यक्त गर्दै जनतासँगको विश्वासको सम्बन्ध अझ सुदृढ बनाउँदै अघि बढ्ने उल्लेख गरेका छन्।