काठमाडौंस्थित त्रिभुवन अन्तर्राष्ट्रिय विमानस्थलले एक यात्रुको बिदाइमा बढीमा तीन जना मात्र आफन्त आउन पुनः आग्रह गरेको छ।
नेपाल नागरिक उड्डयन प्राधिकरणअन्तर्गत विमानस्थल कार्यालयले पछिल्ला दिनहरूमा बिदाइका लागि आउने भीड अत्यधिक बढेको भन्दै यस्तो अनुरोध दोहोर्याएको हो। एक यात्रुको लागि १० जनासम्म आफन्त पुग्दा विमानस्थल परिसरमा अनावश्यक भीडभाड हुने गरेको प्रशासनले जनाएको छ।
विमानस्थल व्यवस्थापनका अनुसार भीड बढ्दा सुरक्षा व्यवस्थामा चुनौती थपिनुका साथै स्वदेशी तथा विदेशी यात्रुहरूको आवागमनमा समेत असहजता सिर्जना भएको छ।
यसअघि पनि पटक–पटक सूचना जारी गरिए पनि भीड नियन्त्रणमा उल्लेखनीय सुधार नभएको विमानस्थल प्रशासनले बताएको छ। सोही कारण अबदेखि एक यात्रु बराबर बढीमा तीन जना मात्र बिदाइ वा स्वागतका लागि आउन अनुरोध गरिएको छ।
प्रशासनले यात्रुहरूको सहज आवागमन र सुरक्षा सुनिश्चित गर्न सबैको सहयोग आवश्यक रहेको स्पष्ट पारेको छ।
