प्रधानमन्त्री बालेन्द्र शाह संयुक्त राष्ट्रसंघको ८१औँ महासभामा सहभागी भएर स्वदेश फर्किए पनि भ्रमणबारे संसदलाई औपचारिक जानकारी नगराइएको विषय प्रतिनिधिसभामा उठेको छ ।
नेकपा एमालेकी सांसद टुकाभद्रा हमालले मंगलबार सदनमा बोल्दै प्रधानमन्त्रीको विदेश भ्रमणअघि उद्देश्य, एजेण्डा र राष्ट्रहितका प्राथमिकताबारे तथा स्वदेश फर्किएपछि भ्रमणका उपलब्धि र महत्वपूर्ण भेटवार्ताबारे संसदलाई जानकारी गराउने संसदीय अभ्यासलाई गम्भीरतापूर्वक लिनुपर्ने बताइन् ।
उनले प्रधानमन्त्री प्रतिनिधिसभाबाट निर्वाचित कार्यकारी प्रमुख भएकाले विदेश भ्रमणका विषयमा संसद्प्रति जवाफदेही हुनुपर्ने धारणा राखिन् । यस्तो जानकारी नदिँदा सरकार संसद्प्रति जवाफदेही नभएको सन्देश जाने उनको भनाइ थियो ।
हालसम्म उक्त भ्रमणबारे प्रधानमन्त्रीले प्रतिनिधिसभामा औपचारिक जानकारी नदिएको विषयलाई सांसद हमालले सदनमा उठाएकी हुन्।
