प्रमुख प्रतिपक्षी दल नेपाली कांग्रेसले राष्ट्रपति रामचन्द्र पौडेलले सरकारको नीति तथा कार्यक्रम प्रस्तुत गरिरहँदा प्रधानमन्त्री बालेन शाह संसद् बैठकबाट बाहिरिएको घटनाबारे स्पष्टिकरण माग गरेको छ।
मंगलबार प्रतिनिधिसभा बैठकमा बोल्दै कांग्रेस सांसद वासना थापाले उक्त घटनाप्रति प्रधानमन्त्रीको जवाफ आवश्यक रहेको बताइन्। उनले यो दृश्य लोकतान्त्रिक संसदीय अभ्यासको इतिहासमा विरलै देखिने घटना भएको टिप्पणी गरिन्।
थापाका अनुसार राष्ट्रपति जस्तो सर्वोच्च पदाधिकारीले नीति तथा कार्यक्रम प्रस्तुत गरिरहँदा प्रधानमन्त्री संसद् छाडेर बाहिरिनु सामान्य घटना होइन। उनले यसले संवैधानिक संस्कार, संसदीय परम्परा र राज्यको उत्तरदायित्वमाथि प्रश्न उठाएको बताइन्।
सांसद थापाले यस्ता घटनाको पुनरावृत्ति रोक्नुपर्नेमा जोड दिँदै लोकतन्त्रमा पदभन्दा मर्यादा र जनविश्वास अझ महत्वपूर्ण हुने धारणा राखिन्। उनले कांग्रेसको तर्फबाट प्रधानमन्त्रीको स्पष्ट जवाफ माग गरेको पनि बैठकमा उल्लेख गरिन्।
