१ साउन, काठमाडौं – राष्ट्रिय स्वतन्त्र पार्टी (रास्वपा) आज दिउँसो पत्रकार सम्मेलन गर्दैछ। पार्टीका प्रवक्ता मनिष झाका अनुसार सम्मेलन आज साढे ३ बजे पार्टीको केन्द्रीय कार्यालय वनस्थलीमा हुने छ।
प्रवक्ता झाका अनुसार पत्रकार सम्मेलनमार्फत पार्टीले समसामयिक राजनीतिक घटनाक्रममाथि आफ्नो आधिकारिक धारणा सार्वजनिक गर्नेछ। साथै, सभापति रवि लामिछानेविरुद्ध भइरहेको भनिएको राजनीतिक प्रतिशोधबारे पार्टीले चालेको हस्ताक्षर संकलन अभियान, संघीय संसद्मा गरेको बहिष्कार, तथा रुपन्देही–३ को आगामी उपनिर्वाचनका सन्दर्भमा उम्मेदवार चयनसम्बन्धी प्रक्रिया लगायत विषयमा जानकारी दिनेछ।
रास्वपाले लामिछानेविरुद्धको प्रकरणलाई राजनीतिक नियतसहितको आक्रमण भन्दै देशव्यापी हस्ताक्षर अभियान सञ्चालन गरिरहेको छ। आजको पत्रकार सम्मेलनमा उक्त अभियानका निष्कर्षसहित थप रणनीति पनि सार्वजनिक हुने अपेक्षा गरिएको छ।
