बुटवल - रुपन्देहीको तिलोत्तमा नगरपालिका-१५ कोटिहवामा आज बिहान भएको सवारी दुर्घटनामा २१ वर्षीय एक युवकको ज्यान गएको छ।
राजमार्ग सुरक्षा तथा ट्राफिक व्यवस्थापन कार्यालय बुटवलका अनुसार मृतक उमेश गुप्ता बुटवल उपमहानगरपालिका-६, पुरानो बसपार्क बस्ने युवक हुन्। दुर्घटना भैरहवादेखि बुटवल तर्फ आउँदै गरेको ना ६ ख ३४३० नम्बरको ट्रकले गुप्ता सवार मधेश प्रदेश ०३-०२९ प ५०७६ नम्बरको बुलेट मोटरसाइकललाई ठक्कर दिँदा भएको हो।
घाइते भएका गुप्तालाई उद्धार गरी क्रिमसन अस्पताल, मणिग्राम लगिएको थियो, जहाँ चिकित्सकहरूले उनलाई मृत घोषणा गरेका थिए।
दुर्घटनामा संलग्न ट्रक चालक, सप्तरी जिल्ला सुरुङ्गा–१ का २९ वर्षीय मुकेश कुमार चौधरीलाई नियन्त्रणमा लिइएको छ र प्रहरीले थप अनुसन्धान अघि बढाएको जनाएको छ।
