काठमाडौं । नेपाली कांग्रेसका नवनिर्वाचित महामन्त्री प्रदीप पौडेलले पार्टीलाई बलियो, गतिशील र एकताबद्ध बनाउने अभियानमा समर्पित भएर लाग्ने प्रतिबद्धता व्यक्त गरेका छन् । १५औँ महाधिवेशनबाट महामन्त्रीमा निर्वाचित भएपछि आफ्नो धारणा सार्वजनिक गर्दै उनले आफूलाई जिम्मेवारी प्रदान गर्ने महाधिवेशन प्रतिनिधि, मतदाता तथा शुभचिन्तकप्रति आभार व्यक्त गरेका हुन् ।
पौडेलले प्राप्त मतलाई आफ्नो राजनीतिक जीवनको महत्वपूर्ण पुँजीका रूपमा लिँदै आगामी राजनीतिक यात्रामा सबैको साथ, सल्लाह र सुझावलाई आत्मसात् गरेर अघि बढ्ने बताएका छन् । पार्टी निर्माणको अभियानमा सबै नेता तथा कार्यकर्तालाई समेटेर अघि बढ्ने उनको प्रतिबद्धता छ ।
उनले महाधिवेशनमा व्यक्त भएको मतले कांग्रेसका नेता तथा कार्यकर्तालाई एकताबद्ध भएर अघि बढ्न सन्देश दिएको उल्लेख गरेका छन् । आन्तरिक प्रतिस्पर्धालाई लोकतन्त्रको स्वाभाविक अभ्यासका रूपमा लिँदै विगतका तिक्तता बिर्सेर भावनात्मक रूपमा समेत एकताबद्ध कांग्रेस निर्माण गर्नुपर्नेमा उनले जोड दिएका छन् ।
‘भावनात्मक रूपमै एक ढिक्का भएको बलियो कांग्रेस निर्माण गर्न हामी सबै सङ्कल्पबद्ध हुनुपर्दछ,’ पौडेलले आफ्नो धारणा सार्वजनिक गर्दै भनेका छन् ।
नेपाली कांग्रेसले विगतमा मुलुकका जटिल समस्याहरू समाधान गर्न खेलेको ऐतिहासिक भूमिकाको स्मरण गर्दै पौडेलले वर्तमान राजनीतिक तथा आर्थिक चुनौती सामना गर्न सक्ने समयसापेक्ष पार्टी निर्माण गर्नु आवश्यक रहेको बताएका छन् ।
उनका अनुसार कांग्रेसलाई आम नागरिकको सुखदुःखको साथी बनाउँदै जनजीविका र लोकतन्त्रको रक्षा गर्ने गतिशील, जनमुखी तथा भरोसायोग्य राजनीतिक शक्तिका रूपमा रूपान्तरण गर्नु अबको मुख्य प्राथमिकता हुनुपर्छ ।
पार्टीको ऐतिहासिक योगदानलाई सम्मान गर्दै वर्तमान समयका आवश्यकता र नागरिकका अपेक्षाअनुसार कांग्रेसलाई रूपान्तरण गर्नुपर्ने उनको भनाइ छ । यसका लागि पार्टीभित्र एकता कायम गर्दै जनताका दैनिक समस्या, जीविकोपार्जन र लोकतान्त्रिक मूल्यको संरक्षणमा केन्द्रित हुनुपर्ने उनले बताएका छन् ।
पौडेलले महाधिवेशन प्रतिनिधि तथा शुभचिन्तकबाट प्राप्त सुझावलाई आत्मसात् गर्दै पार्टीलाई अझ बलियो र जनमुखी बनाउन सक्रिय रहने प्रतिबद्धता व्यक्त गरेका छन् । उनको भनाइले आन्तरिक प्रतिस्पर्धापछि पार्टीभित्र एकता कायम गर्ने र संगठनलाई थप गतिशील बनाउने विषयलाई प्राथमिकता दिएको छ ।
