काठमाडौं, ११ चैत - मध्यपूर्वमा जारी द्वन्द्वका कारण हवाई इन्धनको मूल्यमा तीव्र वृद्धि भएपछि अन्तर्राष्ट्रिय उडान सेवामा असर देखिन थालेको छ। जेटस्टार न्युजिल्यान्डले लागत वृद्धि नियन्त्रण गर्न केही आन्तरिक तथा अष्ट्रेलिया-न्युजिल्यान्डबीचका उडानहरू रद्द गरेको जनाएको छ।
कम्पनीका अनुसार मे महिनामा करिब १२ प्रतिशत उडानहरू प्रभावित भएका छन्। यसमा अकल्यान्ड, क्राइस्टचर्च, वेलिङ्टन, सिड्नी र ब्रिसबेनजस्ता प्रमुख सहरहरूबीच सञ्चालन हुने उडानहरू समावेश छन्।
एयरलाइनले प्रभावित यात्रुहरूलाई वैकल्पिक उडानको व्यवस्था मिलाइएको जनाएको छ। कम्पनीका एक प्रवक्ताका अनुसार मध्यपूर्वको द्वन्द्वसँगै इन्धनको मूल्य वृद्धि र अन्य सञ्चालन लागत बढेकाले उडान तालिकामा अस्थायी समायोजन गर्नुपरेको हो। यात्रुहरूलाई परेको असुविधाप्रति कम्पनीले क्षमायाचना समेत गरेको छ।
यसैबीच, इन्धनको मूल्य र आपूर्तिमा आएको समस्याले अन्य देशका हवाई सेवामा पनि प्रभाव पारेको छ। भियतनाम एयरलाइन्सले हप्तामा करिब दुई दर्जन आन्तरिक उडानहरू रद्द गरेको छ भने म्यानमारका एयरलाइन्सहरूले पनि आफ्नो उडान तालिका घटाएका छन्।
विश्वव्यापी रूपमा बढ्दो इन्धन लागतले हवाई उद्योगमा थप चुनौती सिर्जना गरिरहेको देखिएको छ।
