नेपाली कांग्रेसका महामन्त्री प्रदीप पौडेलले संसद अधिवेशन आह्वान भएको २४ घण्टा नबित्दै स्थगित गरिनु प्रति गम्भीर चिन्ता व्यक्त गरेका छन्। सामाजिक सञ्जालमार्फत प्रतिक्रिया दिँदै उनले यस्तो निर्णयले सरकारको नियतमाथि प्रश्न उठाएको बताएका हुन्।
उनका अनुसार, बलियो बहुमत र अनुकूल राजनीतिक अवस्था हुँदाहुँदै पनि संसदलाई विश्वासमा लिएर नीति निर्माण गर्नुपर्नेमा सरकारले अध्यादेशको बाटो रोज्न खोजेको हो कि भन्ने आशंका पैदा भएको छ। उनले सरकारको राजनीतिक आत्मविश्वास किन कमजोर देखिएको भन्ने प्रश्नसमेत उठाएका छन्।
लोकतान्त्रिक व्यवस्थामा विधि र प्रक्रियाको पारदर्शिता अत्यन्त महत्वपूर्ण हुने उल्लेख गर्दै प्रदीप पौडेल ले प्रक्रिया मिचेर परिणाम हासिल गर्ने प्रयासले प्रणाली र संस्थागत मर्यादाको अवमूल्यन हुने टिप्पणी गरेका छन्। साथै, उनले जननिर्वाचित संस्थाको गरिमा कायम राख्दै संसदलाई पूर्ण रूपमा विश्वासमा लिएर पारदर्शी ढंगले अघि बढ्न सरकारसँग आग्रह गरेका छन्।
