७८ वर्षीय धनपति भण्डारी रसुवाका बाढीपीडितका लागि सहयोग गर्न आफैं सिंहदरबार पुगेका रहेछन्। उनी सिनामङ्गलबाट भदौ १४ गते दिउँसो करिब २ बजे सिंहदरबारको दक्षिण गेट पुगेका थिए। प्रहरीलाई आफू प्रधानमन्त्री राहत कोषमा पैसा जम्मा गर्न आएको बताएपछि उनलाई अर्थ मन्त्रालय पठाइएको थियो।
त्यसपछि उनी अर्थमन्त्री डा. स्वर्णिम वाग्लेको कार्यकक्षमा पुगे। वाग्लेले यो उमेरमा व्यक्तिगत रूपमा यति ठूलो रकम सहयोग गर्न चाहनुभएको हो भनेर सोध्दा भण्डारीले आफूले व्यक्तिगत रूपमा सहयोग गर्न आएको बताए।
भण्डारीले आफ्नो व्यक्तिगत खाताबाट ७ लाख ७७ हजार ७ सय ७७ रुपैयाँको चेक हस्तान्तरण गरेका हुन्। अझ रोचक कुरा, राष्ट्रिय संकटका बेला सरकारलाई सहयोग गरेको यो उनको तेस्रो पटक रहेछ। उनले यसअघि पनि प्रत्येकपटक यही ७,७७,७७७ रुपैयाँ सहयोग गर्दै आएको बताइएको छ। तर यही अंक रोज्नुको कारण भने उनले खुलाएका छैनन्।
धनपति भण्डारीले जीवनको लामो समय भारतमा रोजगारी गरेर बिताएका थिए। छोराछोरी हुर्किएपछि बुटवल फर्किएका उनी पछि छोराछोरीसँगै काठमाडौंको सिनामङ्गलमा बस्दै आएका छन्।
चेक बुझ्दै अर्थमन्त्री वाग्लेले यो रकम गलत ठाउँमा प्रयोग नहुने प्रतिबद्धता जनाएका छन्। उनका अनुसार रकम रसुवाका बाढीपीडितको हितमा खर्च हुने गरी स्थानीय तहमा पठाइनेछ।
सबैभन्दा भावुक क्षण त्यतिबेला देखिन्छ, जब धनपति भण्डारीले वाग्लेलाई भनेका थिए— “हजुरलाई दिएपछि म ढुक्क भएँ, त्यही भएर त खोज्दै–खोज्दै आएको।”
यसैले यो केवल ७ लाख ७७ हजारको सहयोगको कथा होइन, ७८ वर्षको उमेरमा आफ्नै बचतबाट विपद्मा परेका नागरिकका लागि राज्यको राहत कोषमा सहयोग गर्न आफैं सिंहदरबार पुगेका एक वृद्धको मानवीय संवेदनाको कथा हो।
