९ वैशाख, काठमाडौं । अमेरिकाले युद्धविरामको अवधि लम्ब्याउने निर्णय गरेसँगै इरानले त्यसप्रति गम्भीर शंका व्यक्त गरेको छ। इरानी अधिकारीहरू युद्धविराम वास्तवमै कार्यान्वयन हुन्छ कि हुँदैन भन्ने विषयमा विश्वस्त देखिएका छैनन्।
इरानी संसद्का सभामुख मोहम्मद बगर गालिबाफका सल्लाहकार महदी मोहम्मदीले अमेरिकाले कुनै पनि बेला आकस्मिक आक्रमण गर्न सक्ने सम्भावना रहेको भन्दै युद्धविरामप्रति अविश्वास जनाएका हुन्। उनका अनुसार युद्धविराम लम्ब्याउनुको कुनै स्पष्ट औचित्य छैन।
मोहम्मदीले सामाजिक सञ्जालमार्फत प्रतिक्रिया दिँदै पराजित पक्षले सर्त निर्धारण गर्न नसक्ने बताए। उनले घेराबन्दी जारी राख्नु पनि बमबारीसरह भएको उल्लेख गर्दै त्यसको जवाफ सैन्य कारबाहीबाट दिनुपर्ने धारणा राखेका छन्।
उनले अमेरिकाले सम्भावित आक्रमणको तयारीस्वरूप नै युद्धविरामको समय थपेको आरोप लगाउँदै इरानले अब प्रतिकार गर्ने समय आएको संकेत दिएका छन्।
यसैबीच अमेरिकी राष्ट्रपति डोनाल्ड ट्रम्पले अप्रिल २२ मा युद्धविराम अनिश्चितकालसम्म लम्ब्याउने घोषणा गरेका छन्। उनले पाकिस्तानका प्रधानमन्त्री शहबाज शरिफ र सेनाप्रमुख आसिम मुनीरको आग्रहमा उक्त निर्णय लिएको दाबी गरेका छन्।
