देउवाको दाबी: घरमा रकम भेटिएको भनिएका भिडियो एआईद्वारा सिर्जित, आफूविरुद्ध षड्यन्त्र भएको आरोप

काठमाडौं, ११ चैत । पूर्वप्रधानमन्त्री शेरबहादुर देउवाले जेनजी आन्दोलनको सन्दर्भमा आफ्नो निजी निवासबाट ठूलो रकम बरामद भएको भन्ने दाबी गर्दै सामाजिक सञ्जालमा फैलिएका भिडियोहरू कृत्रिम बुद्धिमत्ता (एआई) प्रयोग गरेर बनाइएको हुन सक्ने बताएका छन्।

जेनजी आन्दोलनका क्रममा भएको दमनबारे छानबिन गर्न गठित आयोगसमक्ष बयान दिँदै देउवाले आफूविरुद्ध योजनाबद्ध षड्यन्त्र रचिएको दाबी गरेका हुन्।

गौरीबहादुर कार्कीको नेतृत्वमा रहेको उक्त आयोगले सरकारलाई प्रतिवेदन बुझाइसकेको भए पनि अहिलेसम्म सार्वजनिक गरिएको छैन। यद्यपि, जनआस्था साप्ताहिकको अनलाइन संस्करणमार्फत प्रतिवेदनका अंशहरू क्रमशः बाहिर आइरहेका छन्।

अनलाइनखबरले प्राप्त गरेको प्रतिवेदनको प्रतिलिपिअनुसार देउवाले आफूले कुनै पनि प्रकारको राजनीतिक हस्तक्षेप वा पक्षपात नगरेको स्पष्ट पारेका छन्।

आफ्नो बयानमा उनले २०८२ भदौ २३ गते बूढानीलकण्ठस्थित निजी निवासमा रहेको र सोही साँझ बालुवाटार पुगेर सामाजिक सञ्जालमाथिको प्रतिबन्ध हटाउन आग्रह गरेको उल्लेख गरेका छन्। भोलिपल्ट प्रदर्शनकारीहरू निवासमा भेला हुँदा सुरक्षाकर्मीले नियन्त्रण गर्न खोज्दा झडप भएको र केही युवाहरूले आफूलाई जोगाएको उनको भनाइ छ। उनीहरू राति ढिलो सुरक्षित स्थानमा पुगेका थिए।

देउवाका अनुसार प्रहरीको मुचुल्कामा उल्लेख गरिएको रकम ठूलो नभएको र सामाजिक सञ्जालमा देखाइएजस्तो विवरण अतिरञ्जित वा भ्रामक हुन सक्ने बताएका छन्। उक्त विषयमा आफूले प्रहरीमा औपचारिक उजुरी नगरेको समेत उनले स्पष्ट पारे।

उनले निवासमा भएको तोडफोड, आगजनी र लुटपाटबारे प्रहरीलाई जानकारी गराइएको भए पनि त्यसको कारबाहीबारे आफूलाई जानकारी नभएको बताए। साथै, उनले प्रहरीको मूल्यांकनमा राजनीतिक हस्तक्षेप भएको भन्ने आरोप अस्वीकार गरेका छन्।

देउवाले लोकतान्त्रिक व्यवस्थामा ट्रेड युनियन अधिकारको सम्मान गरिनुपर्ने र विद्यार्थी संगठनहरूले पनि समग्र हितमा काम गर्नुपर्ने धारणा राखेका छन्। उनले गैर–राजनीतिक संस्थाहरूलाई राजनीतिकरण नगर्न आग्रह गर्दै हिंसात्मक गतिविधिमा संलग्न जो–कोहीलाई कानुनी दायरामा ल्याउनुपर्ने बताए। साथै, युवाहरूको भावना सम्बोधन गर्न नीतिगत, कानुनी र संस्थागत सुधार आवश्यक रहेकोमा जोड दिएका छन्।