‘स्पष्टीकरण’ एक शब्दमै पूर्वमन्त्री साहको संकेत: प्रधानमन्त्रीप्रति असन्तुष्टि प्रकट

काठमाडौं - पदमुक्त भएको दुई साता नबित्दै पूर्वमन्त्री दीपक साहले सामाजिक सञ्जालमार्फत एक शब्दमै आफ्नो असन्तुष्टि सार्वजनिक गरेका छन्। उनले लेखेको “स्पष्टीकरण…” शब्दले प्रधानमन्त्री बालेन्द्र शाहप्रति लक्षित संकेत गरेको रूपमा व्याख्या गरिएको छ।

श्रममन्त्रीका रूपमा नियुक्त भएको १४ दिनमै पदबाट हटाइएका साहमाथि आफ्नो प्रभाव प्रयोग गरी श्रीमतीलाई स्वास्थ्य बीमा बोर्डमा जागिर दिलाएको आरोप लागेको थियो। उक्त आरोपपछि प्रधानमन्त्री शाहले उनलाई पदबाट हटाएका थिए। त्यसबेला साहले आफूलाई स्पष्टीकरण दिने अवसरसमेत नदिइएको गुनासो सार्वजनिक गरेका थिए।

यसैबीच वर्तमान गृहमन्त्री सुधन गुरुङ भने अझ ठूलो विवादमा तानिएका छन्। सम्पत्ति शुद्धीकरण प्रकरणमा पक्राउ परेका व्यवसायी दीपक भट्टसँगको साझेदारी सम्बन्ध सार्वजनिक भएपछि गुरुङमाथि प्रश्न उठिरहेका छन्। सामाजिक सञ्जालमा उनको सम्पत्तिको स्रोत र सम्बन्धबारे बहस तीव्र बनेको छ।

यद्यपि, गृहमन्त्रीको हकमा तत्काल बर्खास्तीको संकेत नदेखिएको र बरु लिखित स्पष्टीकरण मागिएको चर्चा चलिरहेको छ, यद्यपि यसको आधिकारिक पुष्टि भइसकेको छैन। यही सन्दर्भलाई इंगित गर्दै पूर्वमन्त्री साहले सामाजिक सञ्जालमा “स्पष्टीकरण…” लेखेका हुन्, जसले आफूलाई नदिइएको अवसर अहिले किन दिइँदैछ भन्ने प्रश्न उठाएको देखिन्छ।