जापानले ताइवान नजिक योनागुनी टापुमा २०३१ सम्ममा मिसाइल तैनाथ गर्ने योजना सार्वजनिक”

काठमाडौँ - जापानले ताइवानबाट करिब ११० किलोमिटरको दूरीमा रहेको योनागुनी टापुमा सन् २०३१ मार्चसम्ममा सतह–देखि–हावा प्रहार गर्न सक्ने क्षेप्यास्त्रहरू तैनाथ गर्ने योजना सार्वजनिक गरेको छ।

जापानका रक्षामन्त्री शिनजिरो कोइजुमी अनुसार, यस टापुमा स्थापना हुने एकाइ मध्यम दूरीका क्षेप्यास्त्रहरूले शत्रुको विमान र मिसाइलहरूलाई रोक्न सक्ने क्षमता राख्नेछन्। यो योजना सन् २०२२ मा घोषणा भएको थियो, र यस पटक जापानले यसको निश्चित समयतालिका पहिलो पटक सार्वजनिक गरेको हो।

विशेषज्ञहरूले यस कदमलाई क्षेत्रीय सुरक्षा सुदृढीकरण र बढ्दो चिनियाँ सैन्य गतिविधि नियन्त्रण गर्ने प्रयासको रूपमा व्याख्या गरेका छन्।

जापानी प्रधानमन्त्री सानाए ताकाइचीको नेतृत्वमा रहेको सरकारले आफ्नो रक्षा क्षमता थप सशक्त बनाउने रणनीति अघि बढाएको देखिन्छ। चीनले ताइवानमाथि आक्रमण भए जापानले आत्मरक्षाका लागि बल प्रयोग गर्न सक्ने संकेतपछि बेइजिङले जापानमाथि कडा कूटनीतिक र आर्थिक दबाब पनि सिर्जना गर्दै आएको छ।

यो घोषणा चीनले २० वटा जापानी कम्पनीमाथि निर्यात प्रतिबन्ध लगाएको भोलिपल्ट आएको हो। विगत एक दशकमा जापानले योनागुनी टापुलाई महत्त्वपूर्ण सैन्य चौकीमा परिणत गरिसकेको छ, जहाँ हाल १६० सुरक्षाकर्मी तैनाथ छन्।