छ वर्षपछि बेलायती प्रधानमन्त्रीको चीन भ्रमण: द्विपक्षीय सम्बन्ध पुनर्जीवित गर्ने प्रयास

१४ माघ, काठमाडौं - बेलायतका प्रधानमन्त्री किएर स्टार्मर चीन भ्रमणका लागि प्रस्थान गरेका छन्। सन् २०१८ यता चीन भ्रमण गर्ने उनी पहिलो बेलायती प्रधानमन्त्री हुन्।

भ्रमणका क्रममा प्रधानमन्त्री स्टार्मरले बिहीबार चिनियाँ राष्ट्रपति सी जिनपिङसँग भेटवार्ता गर्ने कार्यतालिका रहेको छ। बीबीसीका अनुसार, भ्रमण टोलीमा करिब ६० जना बेलायती व्यापारी तथा सांस्कृतिक क्षेत्रका प्रतिनिधि सहभागी छन्। टोलीमा एचएसबीसी बैंक, औषधि कम्पनी जीएसके, जगुआर ल्यान्ड रोभर र नेसनल थिएटरका प्रतिनिधिहरू पनि समावेश छन्।

चीनसँगको सम्बन्धलाई पुनः मजबुत बनाउने बेलायती सरकारको रणनीतिअन्तर्गत यस भ्रमणलाई हालसम्मकै महत्वपूर्ण र ताजा कूटनीतिक कदमका रूपमा लिइएको छ। यद्यपि, आलोचकहरूले चीनको नीतिगत दृष्टिकोण फरक रहेको र कम्युनिस्ट पार्टीसँगको सम्बन्धमा सरकार अझ सतर्क रहनुपर्ने भन्दै चिन्ता व्यक्त गरेका छन्।

प्रधानमन्त्री स्टार्मरले राष्ट्रपति सी जिनपिङसँगको भेटमा मानवअधिकारको विषय उठ्ने कि नउठ्ने भन्ने प्रश्नमा, ‘जहाँ हाम्रो हित र मूल्यहरूमा भिन्नता देखिन्छ, ती विषय उठाइनेछन्’ भन्ने प्रतिक्रिया दिएका छन्।

चीनमाथि उत्तर-पश्चिमी क्षेत्र शिनजियाङमा उइगर समुदाय तथा अन्य मुस्लिम जातीय समूहमाथि मानवअधिकार उल्लंघन गरेको आरोप लाग्दै आएको छ।