काठमाडौंको दक्षिणी भेगमा रहेको कीर्तिपुर नगरपालिका–६ स्थित आदिनाथ मन्दिरमा एक महिने मेला सञ्चालन हुने भएको छ। आश्विन शुक्ल पूर्णिमादेखि कात्तिक शुक्ल पूर्णिमासम्म लाग्ने यो मेला यस वर्ष कात्तिक ९ गतेदेखि सुरु हुनेछ।
मेलाको तयारीस्वरूप मन्दिर परिसर र आसपासका क्षेत्रमा सरसफाइ गरिएको छ। मेला व्यवस्थापन समितिको आयोजना तथा स्थानीय संघसंस्थाको समन्वयमा मन्दिरको सरसफाइ र अन्य तयारीका काम अघि बढाइएको हो। मेलालाई लक्षित गरी मन्दिरलाई सजाएर आकर्षक बनाइएको छ।
मन्दिरमा शिव र पार्वतीको संयुक्त स्वरूप झल्किने मूर्ति रहेकाले यसलाई आदिनाथ तथा अर्धनारीश्वरका रूपमा पनि चिनिन्छ। हिन्दु र बौद्ध धर्मावलम्बीको साझा आस्थाको केन्द्र मानिने यस मन्दिरमा हिन्दुहरूले शिवशक्तिको प्रतीकका रूपमा तथा बौद्ध अनुयायीहरूले लोकेश्वर र करुणाका प्रतीकका रूपमा पूजा गर्ने परम्परा छ।
परिवारमा सुख–समृद्धि प्राप्त हुने तथा भय, रोग र विघ्नबाट मुक्ति मिल्ने धार्मिक विश्वासका साथ भक्तजनहरू मेलामा सहभागी हुने गर्छन्। यस वर्ष करिब दुई लाख भक्तजनले मेला अवलोकन तथा दर्शन गर्ने अनुमान गरिएको मेला व्यवस्थापन समितिले जनाएको छ।
