पराजयपछि एमालेको आत्मसमीक्षा: ‘हार स्थायी होइन, पुनर्गठनसहित फर्किन्छौं’ - विष्णु पौडेल

काठमाडौं । नेकपा एमालेका उपाध्यक्ष विष्णु पौडेलले हालैको निर्वाचनमा भएको पराजयलाई गम्भीर रूपमा लिँदै पार्टीभित्र व्यापक आत्मसमीक्षा र पुनर्गठन गर्ने बताएका छन्।

नेपाल कम्युनिस्ट पार्टी स्थापना दिवसका अवसरमा आयोजित कार्यक्रममा बोल्दै उनले एमाले निराश हुने अवस्थामा नभएको स्पष्ट पारे। उनका अनुसार पार्टीले आफ्ना कमजोरी पहिचान गर्दै नीति, नेतृत्व र संगठनमा सुधार गरी नयाँ ढंगले अघि बढ्नेछ।

पौडेलले एमाले सधैंका लागि पराजित नभएको उल्लेख गर्दै एउटा निर्वाचन हार्नु नै अन्त्य नभएको बताए। उनले भने, जनतामाझ गुमेको विश्वास पुनः प्राप्त गर्न पार्टीले आफूलाई रूपान्तरण गर्न आवश्यक छ।

उनका अनुसार यसपटकको चुनावी नतिजा सामान्य नभई गम्भीर धक्का भएकाले त्यसको कठोर समीक्षा गरिनेछ। २०७२ देखि २०८२ सम्मको अवधिमा दुई तिहाइ बहुमतदेखि ठूलो पराजयसम्मको यात्रालाई समग्र रूपमा मूल्यांकन गर्दै भविष्यको रणनीति तय गरिने उनले बताए।

उनले पार्टीलाई पुनः सशक्त बनाउँदै पुरानै लयमा फर्काउने लक्ष्यसहित एमाले अघि बढ्ने स्पष्ट पारे।